باحثة تطلق مبادرة تطوعية لتوفير الدواء لمصابي كورونا من خلال “أبلكيشن”

أطلت دكتوره هناء أبو طالب مبادرة شبابية تطوعية لتوصيل الدواء لمصابي كورونا من خلال أبليكيشن “هتلاقي دواك مجاناً”.

وتقول دكتوره هناء: “من يوم ما رجعت مصر و أنا بزعل اوي على أوضاع الناس.. و بحاول أساعدهم على أد ما أقدر.. بحاول أكون عنصر فعال يخدم مجتمعه”.

وتابعت: “دخلت صيدلة و اتعلمت إعطاء كافة أنواع الحقن وتعليق المحاليل و أنا في سنة أولى.. عشان أساعد أهل قريتي وفعلا كنت بعمل دا في أوقات كتير بشكل تطوعي… حاولت أطور من نفسي كتير.. و اخدم في مجالات مجتمعية مختلفة”.

وأضافت: “اتجوزت.. و اتخرجت.. و خلفت وبمعايير المجتمع اللي انا فيه الحياة غالبًا بتقف على كدا،، بس أنا كملت الحمدلله وحققت حلمي الأول البسيط وفتحت صيدلية ليا”.

وتستطرد قائلة: “بس طبعاََ اتفاجئت بمشاكل كتير في المنظومة الدوائية شوفتها من خلال شغلي في الصيدلة… الناس بتلف كتير اوي عشان تلاقي دواء.. و كتير يكونوا مضطرين يشتروه باضعاف تمنه.. فكرت إزاي أحل المشكلة دي لغاية ما وصلت لفكرة حبيت اسيب بيها بصمة في حياة الناس”.

واختتمت حديثها: “ابلكيشن “هتلاقي دواك” إللي فيه بحاول أحل مشاكل توفير الأدوية من البداية للنهاية. هو تطبيق مجاني تماما للقضاء على نواقص الأدوية في مصر عن طريق الربط بين مخازن الأدوية و الصيادلة و المريض بطريقة منفصلة و منظمة. و يقدم خدمات كتير لكل فئة كمان تقدر تدور على العلاج على مستوى الجمهورية. وكمان تقدر تطلب استشارة طبية بشكل مجاني و دي حاجة مهمة جدا دلوقتي في زمن الكورونا وهيكون في متطوعين من صيادلة مصر العظماء”.